Шилі елді мекеніне таза ауыз су жеткізілді

Ai-news.kz.  Бүгін Қазалы ауданында Шәкен ауылына қарасты Шилі елді мекеніне ұзақ күткен таза ауыз су жеткізілді. Бұл маңызды әлеуметтік жоба Мемлекет басшысы Қасым-Жомарт Тоқаевтың тапсырмасымен және мемлекетке қайтарылған активтер қаражаты есебінен аймағымызда денсаулық сақтау, білім беру, спорт және коммуналдық инфрақұрылымды жаңғырту бағытында жүзеге асырылып жатқан 14 әлеуметтік жобаның бірі болып табылады.

Аталған жоба аясында Қазалы ауданындағы Сарбұлақ, Шилі, Шәкен және Шитүбек елді мекендерін ауыз су желісіне қосу үшін республикалық, облыстық бюджеттен және қайтарылған активтер қаражаты есебінен барлығы 1,5 млрд. теңге қаржы бөлініп, құрылыс жұмыстары толық аяқталды. Бұл нәтижелі іс-шара шалғай елді мекен тұрғындарының күнделікті тұрмыс сапасын арттыруға және олардың өмірін жеңілдетуге бағытталған.

Шилі елді мекенін ауыз су желісіне қосу рәсіміне аудан әкімі Алмасбек Есмаханов арнайы қатысып, тұрғындарды көптен күткен қуанышымен құттықтады. Аудан басшысы сөзінде өңірдегі әлеуметтік-экономикалық дамудың бағыттарын атап, тұрғындардың тұрмыс сапасын арттыру, ауыл инфрақұрылымын дамыту бойынша атқарылып жатқан жұмыстарға тоқталды:

«Президентіміз Қасым-Жомарт Кемелұлының қолдауымен, аймақ басшысы Нұрлыбек Машбекұлының басшылығымен ауыл халқының табысын арттыру, тұрмыс-тіршілігін жақсарту бағытында жүйелі жұмыстар атқарылуда. Бүгін Шилі елді мекенін ауыз су желісіне қосу рәсімі осы жұмыстардың бір бөлігі. Бұдан бөлек, біз Қарашеңгел ауылдық округіне қарасты Шитүбек елді мекенін ауыз су желісіне қосып, жуық арада Сарбұлақ және Шәкен ауылдарының тұрғындарын да таза ауыз сумен қамтамасыз етеміз. Осы жобалардың нәтижесінде биыл Қазалы ауданы Мемлекет басшысының тапсырмасына сәйкес 100 пайыз таза ауыз сумен қамтылатын болады. Елді мекеннің ауыз су желісіне қосу жұмыстарымен айналысқан мердігер мекеме – «Намыс-Құрылыс» жауапкершілігі шектеулі серіктестігінің құрылысшылары мен осы іске атсалысқан барша азаматтарға алғысымды білдіремін. Қуаныштарыңыз құтты болсын!» – деді аудан әкімі.

Рәсім барысында ауыл шаруашылығы саласының ардагері Берік Бисенбаев көптен күткен игіліктің іске асуымен тұрғындарды құттықтап, ауыл ақсақалы Әзілхан Үмбетов барша азаматтарға батасын берді. Сонымен қатар, ауданның дамуына елеулі үлес қосқан азаматтар мен ауыз су тарту жұмыстарын сапалы әрі уақытында орындаған мердігер мекеме қызметкерлері аудан әкімінің «Алғыс хатымен» марапатталды.

Осылайша, Шилі елді мекенін ауыз су желісіне қосу – тұрғындардың күнделікті өмір сапасын арттыруға, ауыз суға қолжетімділікті қамтамасыз етуге және ауданның әлеуметтік инфрақұрылымын нығайтуға бағытталған маңызды жоба болып табылады. Елді мекен тұрғындарының қуанышы мен ризашылығы мерекелік шараның ерекшелігін арттырып, өңірдегі әлеуметтік даму бағытындағы игі бастамалардың жалғасын көрсетеді.