Шиеліде инфрақұрылым және әлеуметтік қолдау мәселелері талқыланды
Ai-news.kz. ҚР Парламенті Мәжілісінің депутаттары Мұрат Әбенов, Мархабат Жайымбетов және Жарқынбек Амантай, аудан әкімі Айтбай Жандарбековпен бірге «Taza Qazaqstan» Road-эстафетасы аясында Шиелі ауданындағы Руханият орталығында тұрғындармен қоғамдық қабылдау өткізді. Шараға ауданның барлық кенттері мен ауылдық округтерінен келген тұрғындар қатысып, өздерін толғандыратын өзекті мәселелерді тікелей халық қалаулыларына жеткізу мүмкіндігіне ие болды.
Қоғамдық қабылдау барысында тұрғындар ауылдық және қалалық инфрақұрылымның дамуына қатысты бірқатар мәселелерді көтерді. Атап айтқанда, жолдардың сапасы мен жөндеу жұмыстары, ауыз су мен электр энергиясын жеткізу, қоғамдық көлік қозғалысының тұрақтылығы және байланыс желілерінің әлсіздігі секілді түйткілдер талқыланды. Сонымен қатар, әлеуметтік қолдау шаралары, жәрдемақылар мен әлеуметтік төлемдердің уақытылы төленуі, зейнеткерлер мен көпбалалы отбасыларға көрсетілетін көмек көлемі де негізгі тақырыптардың бірі болды.
Кездесу барысында тұрғындар білім және денсаулық сақтау салаларына қатысты мәселелерді де көтерді. Әсіресе, ауыл мектептері мен балабақшалардың материалдық-техникалық базасын нығайту, медициналық қызметтердің қолжетімділігін арттыру, дәрігер мамандардың тапшылығын шешу бағытында нақты ұсыныстар айтылды. Бұдан бөлек, ауыл шаруашылығы өнімдерін өндіру мен өткізу, жер қатынастары және жерді тиімді пайдалану, кооперативтер құру мәселелері де назардан тыс қалмады.
Депутаттар әрбір өтініш пен сұрақты мұқият тыңдап, заң аясында шешу жолдарын түсіндірді. Олардың айтуынша, барлық ұсыныстар тиісті министрліктер мен ведомстволарға жолданып, бақылауға алынады. Тұрғындардың өтініштерін орындау бойынша аудан әкімдігі мен салалық бөлімдерге нақты тапсырмалар беріліп, олардың орындалуы тұрақты түрде қадағаланады.
Аудан әкімі Айтбай Жандарбеков өз кезегінде халықтың әрбір өтінішінің ескерусіз қалмайтынын, жергілікті атқарушы органдар тарапынан барлық сұрақтарға жауап беріліп, заң шеңберінде нақты шешім қабылданатынын атап өтті. Сондай-ақ, тұрғындармен кері байланыс орнатып, өтініштерді тіркеу мен орындау үдерісін жеделдету бағытында жұмыс жүргізілетінін айтты.
Қабылдау соңында Мәжіліс депутаттары мен аудан әкімі азаматтарға ашықтық танытып, өз ойларын еркін білдіргені үшін алғыстарын жеткізді. Олар мұндай кездесулердің негізгі мақсаты – билік пен халық арасындағы байланысты нығайту, жергілікті деңгейдегі өзекті мәселелерді ортақ талқылау арқылы тиімді шешу екенін атап өтті.
Осындай қоғамдық қабылдаулардың өткізілуі – ел мен жер тағдырына бейжай қарамайтын азаматтардың үнін естуге, билік пен қоғам арасындағы өзара сенімді нығайтуға мүмкіндік беретін маңызды алаң. Бұл форматтағы кездесулердің тұрақты өтуі ауданның әлеуметтік-экономикалық даму қарқынын арттырып, тұрғындардың өмір сүру сапасын жақсартуға айтарлықтай серпін беретіні сөзсіз.
