Президент саябағындағы құрылыс жобалары қарқын алды

Ai-news.kz.  Президент саябағындағы нысандар құрылысы қарқынды

Бүгін облыс әкімі Нұрлыбек Нәлібаев құқық қорғау органдарының, жауапты сала мен ірі құрылыс мекемелерінің басшыларымен, сондай-ақ зиялы қауым өкілдерімен бірге президент саябағындағы нысандардың құрылыс жұмыстарын көріп шықты. Жұмыстың қарқыны мен ауқымына қарағанда, бұл аумақ алдағы уақытта қаланың ең көрікті, тұрғындар мен қонақтар үшін ең тартымды орындарының біріне айналатыны анық.

Аймақ басшысы бастаған топ алдымен инвестор қаражатына бой көтеріп жатқан «rixos» қонақ үйінің құрылыс алаңына барды. Мамыр айында басталған құрылыс жұмыстарын «altyn gimarat» жауапкершілігі шектеулі серіктестігі жүргізуде. Жоспар бойынша бес жұлдызды қонақ үйде 150 нөмір, кең көлемді мейрамхана, саябақ аймағы және заманауи автотұрақ қарастырылған. Бұл кешен туристік әлеуетті арттыруға және қала экономикасына қосымша серпін беруге бағытталған.

Қонақ үйдің жанында тоғыз қабатты 15 тұрғын үй салынып жатыр. Бас мердігер «Мелиоратор» серіктестігі. Әрбір үйде 63 пәтерден, жалпы саны 945 пәтер бой көтермек. Бұл жоба қаладағы тұрғын үй тапшылығын азайтып, жүздеген отбасының қоныс тойын тойлауына мүмкіндік береді.

Президент саябағының өзінде де ауқымды қайта жаңғырту жұмыстары жүргізілуде. Бас мердігер «bi global» серіктестігі жобаның аясында 3 аллея, 6 субұрқақ, 5 амфитеатр, 7 балалар ойын алаңы, 4 спорт алаңы, 4 workout аймағы, 7 демалыс аймағы, 4 фудкорт, теннис үстелдері, айналмалы дөңгелек атракцион, би алаңы мен сахна, стритбол, велосипед және жүгіру жолақтары, сондай-ақ сарқырама каналдары мен көпірлерді салуды қолға алған. Бұдан бөлек, шахмат, баскетбол және футбол алаңдары, арқан саябағы мен санитарлық модульдік ғимараттар қарастырылған.

Саябақ аумағында жылдың төрт мезгілінде үздіксіз жұмыс істейтін 300 орындық заманауи балалар тынығу лагері салынуда. Сонымен қатар, ботаникалық білім беру орталығы, қысқы бақтың құрылысы жүріп жатыр. «alem qurylys aq» серіктестігі лагерь аумағында спорт блогын, іс-шараларға арналған event-аймақ, 4 тұрғын аймақ, қонақ үй үлгісіндегі шағын ғимарат, 5 дәстүрлі үлгідегі киіз үй, ашық бассейн, футбол алаңы, сахна және басқа да демалыс орындарын салу үстінде.

Президент саябағы мен "Астана" шағын ауданын байланыстыратын жаяу жүргіншілер көпірі Сырдария өзені үстінен салынады. Бұл көпір қала тұрғындары мен қонақтарына қолайлы жағдай жасап, инфрақұрылымдық байланысты күшейтеді.

Аймақ басшысы құрылыс жұмыстарын сапалы жүргізіп, белгіленген мерзімде аяқтау қажеттігін қатаң ескертті. Оның айтуынша, әрбір жоба халықтың әлеуметтік жағдайын жақсартуға, тұрмыстық инфрақұрылымды дамытуға және өңірдің сәулеттік келбетін жаңа деңгейге көтеруге бағытталуы тиіс.

Сонымен қатар, облыс әкімі Қызылорда қаласындағы Қорқыт ата мемориалды аллеясында жүргізіліп жатқан қайта жаңғырту жұмыстарын көрді. Жалпы аумағы 38 мың шаршы метрден асатын демалыс орнына қосымша жасыл желек отырғызылып, заманауи ойын және спорт алаңдары орнатылуда. Қазіргі таңда абаттандыру жұмыстарының басым бөлігі аяқталды.

Қала тұрғындары жаңарған мәдениет және демалыс паркінің жаңа келбетіне дән риза. Мұнда жаңа арка орнатылып, «сыр батырлары» ескерткіші тағзым алаңына ауыстырылды. Қоршаулар мен жүргіншілер жолы жаңартылып, 544 түп ағаш пен қылқан жапырақты көшеттер отырғызылды. Бұдан бөлек, скейтпарк, воркаут алаңдары, балаларға арналған ойын аймақтары, фудкорттар және ашық амфитеатр пайдалануға берілді.