«Көшпенділер» фильміне рухани талдау жасалды
Ai-news.kz. Аудан әкімінің бастамасымен құрылған "Рухани өрлеу" шығармашылық орталығы Ел тарихын кеңінен таныту, жас буынның рухани дүниетанымын тереңдету және ұлттық мұраға деген құрметті арттыру мақсатында ауқымды шара ұйымдастырды. Бұл жолғы басқосу Ілияс Есенберлиннің 110 жылдығына арналды. Қазақ әдебиетінің ірі тұлғасы саналатын жазушының шығармалары елдік рухты қалыптастыруға қосқан үлесімен, тарихи оқиғаларды көркем тілмен жеткізе білуімен ерекшеленеді. Сондықтан орталық мүшелерінің мерейтой аясында осындай тағылымды іс-шара өткізуі — рухани тәрбие берудің маңызды тетіктерінің бірі болып табылады.
Шара барысында қатысушылар жазушының әйгілі «Көшпенділер» трилогиясының желісі бойынша түсірілген тарихи «Көшпенділер» фильмін тамашалады. Фильмді көргеннен кейін туындының идеялық мазмұны, көркемдік ерекшелігі және онда көтерілген елдік мәселелер кеңінен талқыланды. Қатысушылар фильмнің оқиғалары арқылы қазақ халқының сан ғасырлық тарихында ел бірлігі мен тәуелсіздікті қорғаудың қаншалықты маңызды болғанын атап өтті. Сонымен бірге фильмде көрсетілген ерлік, батырлық және туған жерге деген шынайы сүйіспеншілік секілді құндылықтар бүгінгі жас ұрпаққа да бағыт-бағдар болатыны жайында пікірлер ортаға салынды.
Талдау барысында Ілияс Есенберлин шығармаларының қазіргі заманмен үндесетін тұстары да сөз болды. Қатысушылар жазушының тарихты көркем тілмен жеткізу арқылы ұлттық сананы қалыптастыруға айрықша үлес қосқанын айтты. Фильмдегі көріністер арқылы елдік идеяның, бірлік пен ынтымақтың халықты қандай қиын кезеңдерден алып шыққаны жан-жақты түсіндірілді. Жастар үшін мұндай туындылардың тәрбиелік мәні зор екендігі, оларды ұлттық рух пен отансүйгіштікке баулуда маңызды рөл атқаратыны ерекше атап өтілді.
Шара соңында "Рухани өрлеу" шығармашылық орталығының қоғамдық-мәдени іс-шараларға белсенді түрде қатысып жүрген бірқатар азаматтары мен белсенді мүшелері Әдеп жөніндегі уәкілдің Алғыс хаттарымен марапатталды. Бұл марапаттар олардың қоғамдық өмірдегі белсенділігін арттырып қана қоймай, жас ұрпақты рухани-мәдени ортаға тартуға деген ынтасын күшейте түсті.
Осындай мазмұнды іс-шаралар жастардың ұлттық құндылықтарға деген қызығушылығын арттырып, ел тарихына деген құрметін нығайтады. Көркем фильмді талдау арқылы тарихи оқиғаларды жаңа қырынан танып, ұлттық рухты еселеу — өңірдегі рухани тәрбиенің маңызды бағыттарының бірі болып қала береді.
