Таразда мектеп оқушысы пышақ жарақатынан қаза тапты
318
Ai-news.kz. Тараз қаласында 1 қыркүйек күні қайғылы жағдаймен аяқталды. Жасөспірім пышақ жарақатынан көз жұмды.
Әлеуметтік желілерде бұл оқиға 1 қыркүйек кешкісін қаланың бір ықшамауданында болғаны жазылды.
"2025 жылғы 1 қыркүйекте Тараз қаласында жасөспірімдер арасында жанжал шығып, соның салдарынан біреуі пышақ жарақатын алып, қаза тапты. Оқиға оқу процесінен тыс жерде болған. Қақтығыс тұрмыстық себептен туындаған, ал жасөспірімдер бір-бірімен бұрын таныс болмаған", – деп мәлімдеді Тараз қалалық білім бөлімі.
Сонымен қатар әкімдікте екі мектеп оқушылары арасындағы төбелес туралы ақпаратты жоққа шығарды.
"Топтық төбелес фактілері анықталған жоқ. Полиция мәліметінше, жасөспірім күдікті ұсталып, уақытша ұстау изоляторына қамалды. Қазір тергеу шаралары жүргізіліп жатыр", – деп қосты қалалық білім бөлімі.
Ал Жамбыл облысы полиция департаменті аталған дерекке қатысты Қылмыстық кодекстің 99-бабы "Адам өлтіру" бойынша қылмыстық іс қозғалғанын мәлімдеді.
