Егін егу маусымына дайындық және су тапшылығы мәселелері талқыланды
Ai-news.kz. Ауданда егін шаруашылығына қатысты өзекті мәселелерді талқылауға арналған арнайы мәжіліс өтті. Жиынға аудан әкімі Берік Сәрменбаев, облыстық ауыл шаруашылығы және жер қатынастары басқармасының басшысы Талғат Дүйсебаев қатысып, өңірдегі су тапшылығы жағдайында алдағы егін егу маусымына дайындық барысы жан-жақты қаралды. Кездесудің негізгі мақсаты – су ресурстары шектеулі кезеңде аграрлық саланың тұрақтылығын қамтамасыз ету, шаруашылықтардың нақты ахуалын зерделеу және тиімді шешімдер қабылдау болды.
Мәжіліске сондай-ақ ауданға жұмыс сапарымен келген “Қазсушар” РМК Қызылорда филиалы директорының орынбасары Айдос Асанбаев, Су ресурстарын реттеу, қорғау және пайдалану жөніндегі Арал–Сырдария бассейндік су инспекциясының басшысы Зейнулла Қазтоғанов, «Қызылорда крахмал-сірне зауыты» ЖШС-нің директоры Шухрат Құрбанов, “Аграрлық Несие Корпорациясы” АҚ облыстық филиалының өкілі Нұржан Жаналиев, “Фитосанитария” Қызылорда облыстық филиалының директоры Жанат Дүзелбаева, сондай-ақ тиісті сала басшылары мен шаруа қожалықтарының жетекшілері қатысты. Кеңейтілген құрамда өткен жиын аграрлық саладағы өзара үйлесімді іс-қимылды күшейтуге бағытталды.
Жиын барысында облыстық ауыл шаруашылығы және жер қатынастары басқармасының басшысы Талғат Дүйсебаев вегетациялық кезеңде аудандағы суармалы егіншілікпен айналысатын шаруашылықтардың қазіргі жағдайына тоқталды. Ол биылғы ауыл шаруашылығы науқанының қорытындылары мен келер жылғы егін егу кезеңіне жоспарланған негізгі жұмыс бағыттарын баяндап, Сырдария өзені бойындағы су көлемінің азаюы егістік алқаптарына елеулі әсер етіп отырғанын атап өтті. Осыған байланысты су ресурстарын тиімді пайдаланудың маңыздылығына ерекше назар аударылды.
Күн тәртібіндегі мәселелер бойынша сөз алған сала мамандары суармалы сумен қамтамасыз ету тетіктерін жетілдіру, су тапшылығының салдарын барынша азайту және егіс құрылымын қайта қарау қажеттігін айтты. Атап айтқанда, күріш алқаптарын кезең-кезеңімен қысқартып, су аз қажет ететін дақылдарға – жүгері, мақсары және өзге де балама өнімдерге көшу жөнінде ұсыныстар білдірілді. Бұл бағыттағы өзгерістер аграрлық өндірістің экономикалық тиімділігін арттырып қана қоймай, су ресурстарын ұтымды пайдалануға мүмкіндік беретіні айтылды.
Сонымен қатар мәжілісте Мемлекет басшысының ауыл шаруашылығында су үнемдеу технологияларын кеңінен енгізу жөніндегі тапсырмалары кеңінен талқыланды. Осы орайда тамшылатып және жаңбырлатып суару әдістерін енгізу, су арналары мен қашыртқыларды тазалау, су есепке алу жүйесін жетілдіру мәселелері күн тәртібіне шығарылды. Бұл шаралар су шығынын азайтып, егістік алқаптарының өнімділігін сақтауға бағытталған.
Жиын барысында шаруашылық құрылымдарының өкілдері де өз ұсыныс-пікірлерін білдіріп, кездесіп отырған нақты мәселелерді ортаға салды. Аудан әкімі Берік Сәрменбаев мәжілісті қорытындылай келе, алдағы вегетациялық кезеңге дайындықты бүгіннен бастап күшейтудің маңызын атап өтті. Ол көктемгі дала жұмыстарына қажетті тұқым, тыңайтқыш және ауыл шаруашылығы техникаларын толық әрі сапалы әзірлеу, су көздерін тиімді пайдалану бағытында нақты жоспарлар қабылдау қажеттігін жеткізді. Сондай-ақ барлық жауапты сала басшылары мен шаруашылық жетекшілерін бірлесе, үйлесімді жұмыс істеуге шақырып, аграрлық саланың тұрақты дамуын қамтамасыз ету – ортақ міндет екенін атап өтті.
