«Алтын орақ – 2025»: Шиелідегі егін ору науқаны еңбек мерекесіне айналды

06 қыркүйек 2025, 21:07

305

Ai-news.kz. Киелі Сыр өңірінде күздің басты мерекелерінің бірі саналатын «Алтын орақ» егін жинау науқаны басталды. Шиелі ауданының Ыбырай Жақаев ауылындағы «Мақсат» шаруа қожалығының алқабында өткен салтанатты жиынға аудан әкімі Айтбай Жандарбеков, халық қалаулылары, еңбек ардагерлері, шаруа қожалықтарының жетекшілері мен зиялы қауым өкілдері қатысты.

Аудан басшысы диқандарды алғашқы орақ түсуімен құттықтап, дала еңбегінің қадірі мен ауыл шаруашылығы саласының ел экономикасындағы орны ерекше екенін атап өтті:

«Күннің аптап ыстығында да, қара суығында да егінге көздің қарашығындай қараған еңбектеріңіз елдің несібесіне айналсын. Сіздердің табандылықтарыңыз – ауданымыздың берекесі мен ырысының кепілі», – деді әкім.

Егін көлемі мен бағыттар

2025 жылы аудан бойынша жалпы 31 512 гектар жерге егін егілді, оның ішінде:

• дәнді дақылдар – 14 783 гектар

• мал азықтық дақылдар – 10 332 гектар

• көкөніс, бақша, картоп – 5 267 гектар

• майлы дақылдар – 1 130 гектар

Негізгі дақыл – күріш көлемі 12 301 гектарды құрайды. Сонымен қатар егісті әртараптандыру бағытына айрықша мән беріліп, бидай, жүгері, майлы дақылдар, көкөніс пен бақша егістігінің көлемі былтырғы жылмен салыстырғанда айтарлықтай артқан.

Су тапшылығына қарамастан жеткен жетістік

Биылғы егін маусымындағы басты мәселе – су тапшылығы болды. Соған қарамастан, шаруалар жаңа технологияларды қолдана отырып, 9500 гектар жерді лазерлік тегістеді, 2100 гектарға тамшылатып суару әдісін енгізді. Бұл тәсілдер өнімділікті арттыруға және суды үнемдеуге мүмкіндік береді.

Сонымен бірге шаруалар егістікті кезектеп суару, қашыртқыдағы суды екінші рет пайдалану тәжірибесін енгізіп, суды аз қажет ететін дақылдардың көлемін көбейтті.

Еңбек мерекесі – ел мерекесі

Жиын барысында ауыл шаруашылығы ардагерлері мен құрметті азаматтар тілектерін білдіріп, бата берді. Ал аудандық мәдениет үйінің өнерпаздары мерекелік концерт ұйымдастырып, еңбек мерекесінің шырайын кіргізді.