Қызылордада кезекте тұрған отбасылар жаңа пәтерге қоныстанды

14 тамыз 2025, 18:13

238

Ai-news.kz. Бүгін Сырдария өзенінің сол жағалауындағы жаңа қала аумағында салынған көпқабатты тұрғын үйлер кезекте тұрған отбасыларға табысталды. Салтанатты рәсімге облыс әкімі Нұрлыбек Нәлібаев, Парламент Сенаты мен Мәжілісінің депутаттары, қоғам қайраткерлері мен ел ағалары қатысты.

Облыс әкімі жаңа қоныс иелерін құттықтап, аймақтағы әлеуметтік-экономикалық даму жетістіктерін атап өтті. Аймақ басшысы бұл игі істі ел Тәуелсіздігінің жаңа белестерімен, Қызылорданың Қазақ елі астанасы болғанына 100 жыл толуымен және құрылысшылардың кәсіби мерекесімен байланыстыра отырып, қоныс тойдың ерекше мәнге ие екенін айтты.

«Жаңа баспаналардың іргетасы берік, қабырғасы мығым болсын. Әр отбасының шаңырағы татулық пен берекеге толы болғай!», – деді облыс әкімі Нұрлыбек Нәлібаев.

Рәсім барысында Наурызбай Байқадамов та тұрғындарға құттықтауын жеткізсе, қоғам қайраткері Бақберген Досманбетов жаңа пәтер иелеріне бата берді. Үйлерді салған құрылысшылар мен мамандар облыс әкімінің Алғыс хатымен марапатталды.

Әлеуметтік нысандар мен ірі жобалар

Аймақ басшысы соңғы жылдары өңірде атқарылған ірі инфрақұрылымдық жобаларға тоқталды.

• «Сыр жұлдыздары» шығармашылық-инновациялық академиясы іске қосылды.

• Физика-математика бағытындағы «Білім-инновация» лицей-интернаты ашылды.

• Қазанғап атындағы Қызылорда музыкалық колледжінің жаңа ғимараты ел игілігіне берілді.

• Облыстық тарихи-өлкетану музейі ашылды.

• 11 мың орындық жаңа стадион мен мүмкіндігі шектеулі жандарға арналған спорт кешені құрылысы аяқталуға жақын.

• Қаланың мәдени өміріне серпін беретін «Қызылорда Арена» спорт кешені мен «Достық үйі» бой көтеруде.

Сонымен бірге қалада «Таза Қазақстан» бағдарламасы аясында көпқабатты үйлердің аулалары абаттандырылып, саябақтар мен демалыс орындары жаңғыртылуда. Президент саябағы, Қорқыт Ата мемориалды аллеясы және қалалық мәдени-демалыс паркіне күрделі жөндеу жүргізілді.

Тұрғын үй құрылысы қарқынды

Соңғы үш жылда облыста 2,5 миллион шаршы метр тұрғын үй пайдалануға берілді. Осы уақыт аралығында кезекте тұрған әлеуметтік осал топтарға, апатты үйде тұрып келген азаматтарға бес мыңнан астам пәтер үлестірілді.

25 мыңға жуық тұрғын жаңа қонысқа ие болды. Аудан орталықтарында салынған 1 500-ге жуық пәтер тұрғындарға берілді.

Биылғы жылы да тұрғын үй құрылысы жалғасуда.

• 3 800 дайын пәтерді сатып алуға бюджеттен қаржы бөлінді;

• Жыл соңына дейін 870 мың шаршы метр тұрғын үйді қолданысқа беру жоспарлануда;

• Тек Қызылорда қаласының өзінде соңғы үш жылда 5 600 пәтер халыққа берілсе, биыл жыл соңына дейін тағы 3 мыңға жуық пәтер кілті иелеріне табысталмақ.

Бұл көрсеткіштер өңірде тұрғын үй құрылысының жүйелі түрде жүргізіліп жатқанын және халықтың баспанаға қол жеткізу мүмкіндігінің жыл сайын артып келе жатқанын дәлелдейді.