Қызылордада Жалағаш ауданының өнімдері төмен бағамен сатылды

Ai-news.kz. Қызылорда қаласында «Алтын күз – 2025» мерекесі аясында Жалағаш ауданының ауыл шаруашылығы өнімдерінің жәрмеңкесі жоғары деңгейде өтті. Таңғы сағат 08:00-де басталған жәрмеңке қала тұрғындары мен қонақтары үшін ерекше мерекелік көңіл-күй сыйлап, аудан диқандарының жыл бойғы еңбегінің нәтижесін паш етті. Шараның басты мақсаты – тұрғындарды қолжетімді әрі сапалы ауыл шаруашылығы өнімдерімен қамтамасыз ету, жергілікті өндірушілерді қолдау және өңірдің аграрлық әлеуетін кеңінен насихаттау болды.

Жәрмеңкені облыс әкімі Нұрлыбек Нәлібаев, ҚР Парламенті Мәжілісінің депутаттары және Жалағаш ауданының әкімі Ардақ Ибраимов арнайы аралап көріп, аудан шаруаларының еңбегін жоғары бағалады. Аймақ басшысы мұндай шаралар ауыл мен қала арасындағы экономикалық байланысты нығайтып, жергілікті өнімдердің нарықтағы бәсекеге қабілеттілігін арттыратынын атап өтті. Аудан әкімі өз кезегінде жәрмеңке – аудан еңбеккерлерінің қажырлы еңбегінің көрінісі екенін және мұндай шаралар Жалағаш өнімдерінің танымалдығын арттыра түсетінін айтты.

Жәрмеңкеге ауданнан барлығы 60 автокөлікпен жалпы құны 43 миллион теңгені құрайтын ауыл шаруашылығы өнімдері жеткізілді. Сауда сөрелерінде 40 тонна күріш, 30 тонна картоп, 20 тонна жуа, 20 тонна асқабақ, 10 тонна сәбіз, 10 тонна қауын, сондай-ақ қызанақ, қияр, бұрыш, қырыққабат, баклажан, қызылша, алма, қарбыз және балық өнімдері молынан ұсынылды. Бұдан бөлек, ет және сүт өнімдері де төмендетілген бағамен сатылымға шығарылды. Тұрғындардың сұранысын ескере отырып, жәрмеңкеде 10 тонна мал азығы, 300 дана жоңышқа және 500 дана шөп пресс те қолжетімді бағамен сатылды.

Айта кету керек, өнімдердің бағасы базардағы орташа құнынан 15-30 пайызға төмен болды. Бұл жағдай қала тұрғындарының қызығушылығын арттырып, жәрмеңкеге келушілердің санын айтарлықтай көбейтті. Көптеген тұтынушылар аудан өнімдерінің сапасы мен балғындығына оң баға беріп, өз ризашылықтарын білдірді. Мұндай шаралар, бір жағынан, тұрғындарды тиімді бағадағы табиғи өнімдермен қамтамасыз етсе, екінші жағынан, аудан шаруаларына өз еңбектерін тікелей тұтынушыға ұсынуға мүмкіндік береді.

Жәрмеңке барысында қала тұрғындары мен қонақтары тек сауда жасап қана қоймай, ауылдың табиғи өнімдерімен, олардың дайындалу жолдарымен танысып, өндірушілермен еркін әңгімелесті. Бұл өз кезегінде тұтынушылар мен өндірушілер арасындағы сенімді қарым-қатынасты қалыптастыруға жол ашты.

Жалағаш ауданы үшін мұндай іс-шаралар экономиканың аграрлық секторын дамытуда ерекше маңызға ие. Аудан еңбеккерлерінің қажырлы еңбегі мен бірлескен жұмысының нәтижесінде жәрмеңке жоғары деңгейде ұйымдастырылып, өз мақсатына толық жетті. Қала тұрғындары үшін бұл күн тек тиімді сауда ғана емес, ауыл мен қаланың өзара ынтымақтастығы мен бірлігінің айқын көрінісі болды.