Қазалыда электр қуатын арттыру мақсатында қосалқы станса құрылысы жүргізілуде

Ai-news.kz.  Электр энергиясының қуаттылығын арттыру мақсатында қосалқы стансасының құрылысы жүруде

Қазалы ауданында соңғы жылдары тұрғындарды сапалы электр энергиясымен қамтамасыз ету бағытында ауқымды жұмыстар атқарылып келеді. Бұл – уақыт талабы. Себебі аудан орталығы ғана емес, оған қарасты елді мекендерде де халық саны артып, жаңа тұрғын үйлер мен әлеуметтік нысандар бой көтеруде. Осыған байланысты энергияға деген сұраныс та күн сайын өсіп отыр. Дәл осы қажеттілікті өтеу мақсатында биыл бірқатар маңызды жобалар қолға алынды. Соның ішінде ең ірілерінің бірі – Қазалы қаласы мен Әйтеке би кентінің аралығындағы жаңадан ашылған кварталдарды электр қуатымен қамтуға арналған қосалқы стансаның құрылысы.

Аудан әкімінің міндетін атқарушы Жалғас Сүйеубаев жақында аталмыш құрылыс алаңына арнайы барып, жұмыс барысымен танысты. Ол Әйтеке би кентінің оңтүстік-батыс бөлігінде бой көтеріп жатқан нысанды аралап, мердігерлермен кездесті. Жиын барысында Жалғас Оңғарұлы қосалқы стансаның маңыздылығына айрықша тоқталды.
 — Бұл жоба кент пен қала аралығындағы жаңа қоныстар үшін аса қажет. Соңғы жылдары бұл аумақта жүздеген жаңа үй салынып, халық қоныстана бастады. Сондықтан уақыт созбай, жұмысты сапалы әрі мерзімінде аяқтау керек. Қарапайым тұрғындар үшін жарықтың тұрақты берілуі ең басты талап, – деді ол.

Жауапты мердігер мекеме – «Энергомера» ЖШС. Компания басшысы Бекетай Мұқашов қазіргі таңда атқарылып жатқан жұмыстар туралы баяндады. Оның айтуынша, құрылысқа қажетті барлық материалдар жеткізілген. Жер қазу жұмыстары толығымен аяқталып, фундамент блоктары орнатылған. Қазір құрылыс-монтаж жұмыстары қызу қарқынмен жүріп жатыр. Жалпы жұмыс көлемінің шамамен 40 пайызы орындалған.

Айта кетейік, тек бұл жоба ғана емес, биыл Қазалы қаласы мен Қожабақы ауылындағы ескі электр желілерін жаңарту ісі де қолға алынған. Бұл жұмыстардың нәтижесінде тозығы жеткен желілердің үлесі қазіргі 62,5 пайыздан 58 пайызға дейін төмендемек. Бұл көрсеткіштің өзі ауданның энергетикалық инфрақұрылымын жақсартудағы нақты қадам болып саналады.

Сонымен қатар ауданға қарасты Түктібаев, Бозкөл, Жалаңтөс батыр, Қ.Пірімов, Жанкент және Абай ауылдарындағы жеке тұрғын үй секторын электрмен қамтамасыз етуге қатысты да жобалық-сметалық құжаттар дайындалып, сараптаманың оң қорытындысы алынған. Қазіргі таңда бұл құжаттар тиісті министрлікке жолданып, қаржыландыру мәселесі қаралуда. Бұл ауылдардың тұрғындары үшін де алдағы уақытта жарық мәселесінің түбегейлі шешілетініне үміт зор.

Жалпы алғанда, Қазалы ауданында энергетикалық жүйені жаңғырту – күн тәртібінен түспейтін маңызды мәселе. Қосалқы станса құрылысының уақытылы аяқталуы тек жаңа қоныстарға ғана емес, жалпы ауданның электрмен қамту сапасын арттыруға елеулі үлес қосатыны сөзсіз.