Қызылорда бірінші астана атануының 100 жылдығына орай жаңа әлеуметтік нысандар ашылды

14 маусым 2025, 18:36

385

Ai-news.kz. Арал өңірі халқының өмір сүру сапасын арттыруға бағытталған кешенді бағдарлама аясында білім беру, мәдениет және демалыс салаларында жаңа нысандар ел игілігіне берілді. Бұл игі істер Қызылорданың Қазақстанның тұңғыш астанасы атануының 100 жылдығымен тұспа-тұс келіп отыр.

Жаңа нысандардың ашылу салтанаттарына ҚР Премьер-Министрінің орынбасары Ермек Көшербаев, ҚР Парламенті Сенатының депутаттары Наурызбай Байқадамов пен Руслан Рүстемов, Мәжіліс депутаттары Мұрат Әбенов, Мархабат Жайымбетов, Мұрат Ергешбаев, Қазақстанның Еңбек ерлері Асқар Жұмаділдаев, Абзал Ераліев және басқа да қоғам қайраткерлері қатысты.

– Арал өңірінде жастардың зияткерлік әлеуетін ашуға барлық жағдай жасалуда, – деді Ермек Көшербаев. – Біздің міндетіміз – Қазақстанның ғылыми-технологиялық дамуын қамтамасыз ете алатын ұрпақ тәрбиелеу. Қазіргі уақытта бой көтеріп жатқан мектептер, парктер, мәдени және спорттық нысандар – қалаларымыздың жаңарып, заманауи қоғамдық кеңістіктерге айналып жатқандығының нақты дәлелі.

Физика-математика бағытындағы «Білім-инновация» лицей-интернаты 400 оқушыға арналған. Сонымен қатар 300 орындық жатақхана да қарастырылған. Облыстық білім басқармасының мәліметінше, бұл білім ордасында еліміздің түкпір-түкпірінен келген үздік ұл-қыздар білім алады. Биыл 1447 өтінімнің ішінен 200 ең дарынды оқушы іріктеліп алынды.

Соңғы үш жылда өңірде білім саласына 304,6 миллиард теңге бөлінді. Үш ауысымды мектеп мәселесі түбегейлі шешіліп, Ұлттық жоба аясында 10 жайлы мектептің құрылысы жүргізілуде.

Сондай-ақ Қазанғап атындағы Қызылорда музыкалық жоғары колледжі жаңа ғимаратқа көшті. Онда заманауи құралдармен жабдықталған концерт және би залдары, хор бөлмесі, пәндік кабинеттер жұмыс істейді. Алыс ауылдардан келген жастарға арналған 200 орындық жатақхана да дайын. Бұған дейін жарты ғасырлық тарихы бар оқу орны ескі әрі талапқа сай келмейтін ғимаратта орналасқан еді.

Облыс әкімі Нұрлыбек Нәлібаев жаңа нысан құрылысына қолдау білдіргені үшін «Саутс-Ойл» компаниясының басшысы Серікжан Сейтжанұлына қоғам атынан алғыс білдірді.

Облыстық тарихи-өлкетану музейінің 85 жылдығына орай заманауи жаңа ғимарат пайдалануға берілді. Музей директоры Сапар Күзейбаевтың айтуынша, ғимарат мультимедиялық және цифрлық технологиялармен жабдықталып, экспонаттар ерекше форматта ұсынылған. Кең көлемді көрме павильондары бұрын қоймада шаң басып тұрған бірегей жәдігерлерді жұрт назарына ұсынуға мүмкіндік берді. Барлығы 11 экспозициялық зал бар. Тарихта алғаш рет палеонтология және орта ғасырлар өркениеті залдары ашылды. Құрылысқа «Самұрық-Қазына» ҰӘҚ» АҚ өз үлесін қосты.

Қайта жаңғыртылған қалалық мәдениет және демалыс паркінде 20 жаңа аттракцион орнатылды: шолу дөңгелегі, айналмалы мұнара, американдық төбешіктер, экстремалды карусельдер мен әткеншектер. Сонымен қатар ойын және теннис алаңдары, мини-футбол алаңы, воркаут аймақтары мен веложолдар жабдықталды. Ағаштар отырғызылып, гүлзарлар мен субұрқақтар орнатылды.

– Меценаттардың қолдауымен Арал өңірінде 55 миллиард теңгеден астам сомаға жобалар іске асырылуда, – деді ол. – Қызылордада орталық алаң қайта жаңғыртылса, Жаңақорған, Сырдария, Қазалы аудандарында жаңа демалыс парктері ашылды. Қорқыт ата әуежайының жаңа терминалы, «Анаға тағзым» орталығы, үстел теннисі орталығы, Оқушылар сарайы салынды. Теміржол вокзалдарына күрделі жөндеу жүргізілуде. Жеке инвесторлардың арқасында облыста 80 спорт алаңы салынды, аулалар абаттандырылып, 50-ден астам көпқабатты үйге қасбеттік жаңғырту жасалды. Биыл Ассамблеяның 30 жылдығына орай «Қазатомөнеркәсіп» ұлттық компаниясының қолдауымен жаңа Достық үйі бой көтеруде.

Аталған нысандарда құрылыс жұмыстарын жүргізген мердігер ұйымдардың өкілдері облыс әкімінің алғыс хаттарымен марапатталды.

Сонымен қатар, жеке инвестордың қолдауымен маусымның 1-і, яғни шомылу маусымының басталуына орай, Қызылорда қаласында коммуналдық жағажай ашылды. Бұл суға түсу орны «Эдельвейс» бау-бақша алабы маңында орналасқан.