«Таза Қазақстан» экологиялық акциясы аясында аудан көлемінде тал егу шарасы өтті

Ai-news.kz.  Шиелі ауданында экологиялық мәдениетті қалыптастыру және табиғатты қорғау бағытындағы игі бастамалар жалғасуда. Бүгін аудан әкімі Берік Сәрменбаевтың қатысуымен «Таза Қазақстан» республикалық экологиялық акциясы аясында кең ауқымды тал егу және тазалық жұмыстары ұйымдастырылды. Бұл шараның негізгі мақсаты — елді мекендердің экологиялық ахуалын жақсарту, тұрғындарды қоршаған ортаға деген жауапкершілікке шақыру және жасыл аймақтарды көбейту арқылы табиғатқа қамқорлықты арттыру.

Акцияға аудандық мәслихат төрағасы Е.Әжікенов, облыстық мәслихат депутаты Ж.Ембергенов, аудандық мәслихат депутаттары А.Есназар, А.Ибрагимұлы, Б.Ұлтанбекұлы, мемлекеттік мекеме қызметкерлері, жастар ұйымдарының өкілдері, еріктілер мен аудан тұрғындары белсене қатысты. Жергілікті қоғамдастықтың осындай шараларға бір кісідей жұмылуы — өңір халқының табиғатты аялауға деген жоғары мәдениеті мен азаматтық белсенділігінің айқын көрінісі болды.

Іс-шара барысында аудан орталығындағы және ауылдық округтердегі саябақтар мен көше бойларында мыңдаған ағаш көшеттері отырғызылды. Әсіресе мектеп, балабақша мен мәдениет үйлерінің маңайында жасыл желектер көбейіп, елді мекеннің келбеті көркейе түсті. Көшет отырғызу жұмыстары арнайы жоспар бойынша жүргізіліп, әр мекеме өз аймағын көгалдандыруға үлес қосты. Ағаш егу ісі — экологиялық қауіпсіздікті сақтап қана қоймай, келер ұрпаққа көрікті орта қалдырудың тиімді жолы.

Сонымен қатар, акция аясында кент және ауылдық округтерде кең көлемді көркейту, көгалдандыру және санитарлық тазалық жұмыстары өткізілді. Тазалық науқаны барысында көшелер, аулалар, қоғамдық орындар, демалыс саябақтары мен арық бойлары қоқыстан тазартылып, шөп шабу және талдарды балақтау жұмыстары жүргізілді. Бірқатар ауылдық аймақтарда тұрғындар өз бастамасымен сенбілік ұйымдастырып, елді мекен аумағын абаттандыруға белсенділік танытты.

Аудан әкімі Берік Сәрменбаев тұрғындарға табиғатты қорғау — ортақ міндет екенін айта отырып, мұндай іс-шаралардың тұрақты түрде жалғасатынын атап өтті. «Таза Қазақстан» акциясы — тек бір күндік шара емес, бұл қоршаған ортаға деген саналы көзқарасты қалыптастырып, қоғамда экологиялық мәдениетті арттыруға бағытталған ұзақ мерзімді бастама. Аудан басшысы әрбір азамат өз тұрғылықты жерінің тазалығы мен көркейуіне үлес қосуы қажет екенін ерекше атап өтті.

Сонымен бірге, тазалық жұмыстары барысында ауылдық округ әкімдеріне өз аумақтарында санитарлық жағдайды тұрақты бақылауда ұстау, тұрғындар арасында экологиялық тәрбие жұмыстарын күшейту, ағаш көшеттерінің күтімін қамтамасыз ету жөнінде нақты тапсырмалар берілді.

Бұл экологиялық бастама тұрғындардың бірлігін нығайтып қана қоймай, ауданның табиғи келбетін жаңартып, жасыл белдеулердің көбеюіне сеп болды. «Таза Қазақстан» акциясы — ұлттың экологиялық мәдениетін көтеріп, табиғатқа жанашыр көзқарас қалыптастыратын маңызды қадамдардың бірі болып отыр.

Шара соңында қатысушылар табиғаттың тазалығы мен сұлулығын сақтау — әр адамның азаматтық борышы екенін айтып, мұндай бастамаларға алдағы уақытта да белсене қатысуға дайын екендіктерін жеткізді.