Қызылорда облысында тұмауға қарсы 90 мыңға жуық адам екпе алды

11 ақпан 2024, 19:35

Ai-news.kz. Қызылорда облысында тұмауға қарсы 90 мыңға жуық адам екпе алды.

Тұмау жыл сайын көптеген елдерде эпидемиялық сипатта таралатын жаһандық инфекция. Бұл аурудың эпидемиологиялық маусымы күз, қыс, көктем мезгілдерін қамтиды.

"Ағымдағы 2023-2024 жылғы жаңа эпидемиологиялық маусымда облыс көлемінде жедел респираторлы вирусты инфекцияның ауыр ағымдағы 1896 науқастың сынамасы тұмау ауруына тексеріліп, нәтижесінде зертханалық жолмен нақтыланған тұмау ауруының 318 жағдайы есепке алынды. Тұмау ауруына шалдыққандардың 55% - 14 жасқа дейінгі балалар үлесінде", - деді Қызылорда облысының СЭБД басшысы Динара Жанабергенова.

Бұдан бөлек, жедел респираторлы вирусты инфекцияның ауыр ағымындағы 1453 науқастан алынған сынамалар ПЦР әдісімен тексеріліп, нәтижесінде 194 сынамада тұмау емес вирустар анықталды.

"Тұмаудың эпидахуалын тұрақтандыру және ауру деңгейін төмендету мақсатында жыл сайын жергілікті бюджеттен тұмауға қарсы вакцина сатып алынады. Биылғы эпидмаусымға 84430 доза вакцина алынып, Қазақстан Республикасы Үкіметінің қаулысымен бекітілген тиісті контингенттерге жүргізілді. Олар медицина қызметкерлері, медициналық ұйымда диспансерлік есепте тұрған балалар және балалар үйлерінің, сәбилер үйлерінің балалары, қарттар үйінің контингенті. Сондай-ақ эпидемиологиялық көрсетімдері бойынша жүргізіледі. 83168 адам тұмауға қарсы екпе алып, ағзаның қорғаныс қабілетін күшейтіп алды", - деді ол.

Тұмау өзінің асқынуларымен қауіпті. Ең жиі кездесетін тұмау ауруының асқынуы – пневмония. Басқа да жиі кездесетін асқынулар - бронхит, синусит, отит, миозит, миокардит. Бұл ауру 2 жасқа дейінгі балалар, созылмалы ауруы бар науқастар және қарттар арасында ауыр ағымда өтеді. Сондықтан респираторлық аурулардың бірінші белгілері пайда болған кезде өзін-өзі емдеумен айналыспай, тез арада аймақтық дәрігерлерді үйге шақыртып, дер кезінде ем алу қажет.

Қызылорда облысының санитариялық-эпидемиологиялық бақылау департаменті ЖРВИ және тұмаудан сақтану үшін вакцина алуға, сонымен қатар иммунитетті көтеру үшін салауатты өмір салтын сақтануға, жеке бас гигиенасын орындауға кеңес береді. Сондай-ақ эпидмаусым кезінде көпшілік орындарда, нашар желдетілетін жерлерде бетперде киіп, арақашықтықты сақтау, қолды жиі сабындап жуып, антисептиктерді пайдалану да маңызды. Дәрумендерге бай тағамдарды пайдаланып, салауатты өмір салтын ұстану сіздің денсаулығыңызды нығайтуға өз әсерін тигізеді. Бұл сақтық шаралары тек тұмау мен ЖРВИ-дан ғана емес, өзге де инфекциялық ауруларды жұқтырып алу қаупін төмендетеді.