300 мыңнан астам тұрғын мамандандырылған медициналық көмекке қол жеткізеді
Ai-news.kz. Президент тапсырмасымен Қызылорда облысында қайтарылған активтер есебінен 7 млрд теңгеге жаңа медициналық мекемелер салынады
Мемлекет басшысының тапсырмасына сәйкес, елімізде шетелге заңсыз шығарылған активтерді қайтарып, оларды әлеуметтік маңызы бар нысандар салуға пайдалану жұмыстары жалғасып келеді. Бұл бастама халықтың өмір сапасын арттыруға және өңірлердің инфрақұрылымын жаңғыртуға бағытталған.
Қызылорда облысында осы мақсатқа арнаулы мемлекеттік қордан шамамен 7 миллиард теңге бөлініп отыр. Қаражат Арал, Қазалы, Шиелі және Жаңақорған аудандарындағы орталық аудандық ауруханалар жанынан жаңа ғимараттар салуға жұмсалады. Бұл ғимараттар заманауи медициналық стандарттарға сай салынып, өңірдің денсаулық сақтау жүйесін айтарлықтай күшейтпек.
Жобалар аясында инсульт орталықтары, рентгенхирургия бөлімшелері және басқа да бейінді бөлімдер ашылады. Медициналық мекемелер заманауи жабдықтармен – магниттік-резонанстық томография, компьютерлік томография және ангиографиялық қондырғылармен қамтамасыз етіледі. Бұл ауылдық жерлердегі мамандандырылған медициналық көмектің қолжетімділігін арттырады.
Жоспарланған нысандар іске қосылғаннан кейін 300 мыңнан астам ауыл тұрғыны сапалы және дер кезінде көрсетілетін жоғары технологиялық медициналық қызметке қол жеткізеді. Денсаулық сақтау саласын жаңғыртуға бағытталған бұл қадам өңір халқының өмір сапасына тікелей әсер етпек.
Нысандарды биыл пайдалануға беру көзделіп отыр, бұл өз кезегінде медициналық көмектің сапасы мен жылдамдығын арттыруға мүмкіндік береді.
